Halyqaralyq Túrki akademııasy, ál-Farabı atyndaǵy Qazaq ulttyq ýnıversıteti men Islam Yntymaqtastyǵy Uıymynyń Ǵylymı jáne tehnıkalyq yntymaqtastyq jónindegi turaqty komıtetininiń (COMSTECH) birlesip uıymdastyrýymen «Ál-Farabı - Iqbal» halyqaralyq forýmy ótti, dep habarlaıdy Egemen.kz.
Shyǵys órkenıeti aıasynda túrki jáne ıslam álemi halyqtarynyń tarıhı jady men órkenıettik birligi jónindegi sananyń jańǵyrýyna yqpal etýmen qatar Túrki akademııasy men IYU-ǵa múshe elderdiń azamattaryn ózara tanysýǵa, bir-biriniń tarıhy men mádenıeti týraly bilimderin nasıhattaýǵa, IYU elderiniń ǵylym men tehnıka salasyndaǵy uzaq merzimdi yntymaqtastyǵy arttyrýǵa baǵyttalǵan forýmnyń ashylý saltanatynda Halyqaralyq Túrki akademııasynyń prezıdenti D.Qydyráli ǵasyrlardy jalǵap jatqan ulylar úndestigine arnalǵan forýmynyń mańyzyna toqtalyp ótti.
Aıtýly sharaǵa ýnıversıtet rektory Janseıit Túımebaev, Bilim jáne ǵylym mınıstriniń orynbasary Qýanysh Erǵalıev, TÚRKSOI uıymynyń Bas hatshysy Sultan Raev, asyldyń synyǵy, Ikbaldyń nemeresi Ýálıd Iqbal men IYU Ǵylym men tehnologııalar jónindegi turaqty komıtettiń bas úılestirýshisi Iqbal Chaýdarı, Azııadaǵy ózara senim sharalary Keńesi Hatshylyǵynyń atqarýshy dırektorynyń orynbasary Chı Fang, Qazaqstannyń Pákistan Islam Respýblıkasyndaǵy Tótenshe jáne ókiletti elshi Erjan Qystafın, Pákistannyń Qazaqstandaǵy Tótenshe jáne ekiletti elshisi Sadjad Ahmed Sıhar, Túrkııa Respýblıkasynyń Qazaqstandaǵy Tótenshe jáne ókiletti elshisi Ýfýk Ekıdjı qatysyp, túrki álemine ortaq oıshyldar – ál-Farabı men Muhammed Iqbaldyń baı murasyn zerttep, nasıhattaý isin jalǵastyrý turǵysyndaǵy zerdeli paıymdaryn ortaǵa saldy. Búginde Pákistan men Qazaqstan arasyndaǵy baılanystar ekonomıkalyq ǵana emes, gýmanıtarlyq saladaǵy yqpaldastyq jyldan-jylǵa damyp keledi. Búginde Farabı men Ikbal murasy shyǵys tilderimen qatar kóptegen Eýropa tiline de aýdaryldy. Álemniń kóptegen elderinde dana oıshyldardyń shyǵarmashylyq murasyn zertteý Akademııalar qurylǵan. Máselen, Lahorda Ikbal akademııasy jumys istese, QazUÝ-de Farabı ortalyǵy qurylsa, Qazaqstannyń Ulttyq ǵylym akademııasynda belgili farabıtanýshy ǵalymdar, fılosoftar qyzmet etip keledi.
Konferensııa Iqbal fılosofııasy: ótkeni, búgini, bolashaǵy, Iqbal fılosofııasy men poezııasynyń jahandyq áseri, HHI ǵasyr syn-qaterleri jáne tehnologııa taqyrybyndaǵy seksııalarmen jalǵasty. Sonymen birge Túrki akademııasynyń ázerbaıjan tilinde ázirlegen Muhammed Ikbaldyń «Islam Dusuncesinin Rekonstruksiyasi» (Islamdyq oıdy qaıta qurý) kitabynyń, sonymen qatar 2020 jyly Islamabadta ótken Ál-Farabı jahandyq forýmy materıaldarynyń aǵylshyn, qazaq, orys tilderinde jaryq kórgen jınaǵynyń, ál-Farabıdiń «Mýzyka týraly úlken traktat» atty eńbeginiń túrik tilinde jaryq kórgen nusqasynyń (El-Farabi Kitabu’l Musika’l-Kebir) jáne ýrdý tilindegi «Ikbal ensıklopedııasy» eńbeginiń tusaýkeseri ótip, Iqbal poezııasy álemimen úndesken qylqalam sheberleriniń kórmesi ótti.